Oxirgi yangilanish: 2026-yil 1-oktabr
Maxfiylik siyosati
Saytkor.uz — sun'iy intellekt yordamida sayt yaratish xizmati: saytkor.uz platformasi va foydalanuvchi saytlari joylashadigan saytlarim.uz manzillari. Bu sahifada qanday ma'lumotlarni yig'ishimiz, ularni nima uchun ishlatishimiz, qayerda saqlashimiz va ularni o'chirishni qanday so'rash mumkinligi yozilgan.
Ma'lumotlar operatori: Saytkor.uz platformasi egasi — o'zini o'zi band qilgan shaxs A. Q. Omonov, Toshkent sh. Aloqa: support@saytkor.uz, Telegram: @Saytlarim_uz_Bot (💬 Yordam).
- Nima yig'iladi
- Nima uchun
- Qayerda saqlanadi
- Hamkorlar
- Kimga berilmaydi
- Xodimlar kirishi
- O'chirish
- CRM
1. Qanday ma'lumotlar yig'iladi
- Hisob ma'lumotlari: ismingiz, email manzilingiz va parolingiz. Parol shifrlangan holda saqlanadi — uni hech kim, jumladan biz ham ko'ra olmaymiz.
- Google profili: Google orqali kirsangiz — Google hisobingizdagi ism, email manzili va profil rasmi. Google bizga parolingizni bermaydi, biz xatlaringiz, fayllaringiz yoki kontaktlaringizga kira olmaymiz.
- Sayt ma'lumotlari: saytingiz haqida yozgan tavsifingiz, AI bilan yozishmalar, sayt fayllari va ularning versiyalari, yuklagan rasm va fayllaringiz.
- AI javoblariga fikringiz va foydalanish hodisalari: AI javobi ostida 👍 yoki 👎 bossangiz — bahoingiz va tanlagan sababingiz; muharrir va panelda muhim amallar (masalan, muharrirni ochish, «Bekor qilish», saytni internetga chiqarish urinishi va natijasi, Unit yetmagani haqidagi xabar) — faqat amal nomi, vaqti va sayt/hisob raqami. Bunda siz yozgan matn, parol yoki telefon raqami yozilmaydi.
- Arizalar: saytingizga kirgan odamlar formalar orqali yuborgan ma'lumotlar (odatda ism, telefon va xabar). Bu ma'lumotlar sayt egasiniki: biz ularni saqlaymiz va sayt egasiga Telegram orqali yetkazamiz.
- Mijoz kabineti (Pro va Business): saytingiz mijozi kabinetga kirsa — uning Telegram ID'si va ismi, o'zi Telegram'da ulashgan bo'lsa — telefon raqami. Ular faqat shu saytdagi o'z buyurtma va yozilishlarini ko'rsatish, holat haqida xabar va eslatma yuborish uchun ishlatiladi; mijoz parol kiritmaydi, kirish kodi saqlanmaydi.
- Ulangan xizmatlar: Telegram botni ulasangiz — chat raqami va nomi; Pro yoki Business tarifida o'z botingizni ulasangiz — botning nomi va shifrlangan tokeni; saytingiz Telegram ichida (Mini App) ochilib forma yuborilsa — mijozning Telegram ismi, @username va raqami (ID): ular faqat sayt egasiga yetkaziladi; GitHub'ni ulasangiz — GitHub loginingiz va shifrlangan kirish kaliti.
- To'lov ma'lumotlari: to'lov summasi, sanasi va holati, tanlangan tarif yoki paket; Click ilovasiga hisob yuborish uchun kiritgan bo'lsangiz — telefon raqamingiz. Karta ma'lumotlari (raqami, muddati, kodi) bizga kelmaydi: ular faqat Click sahifasida kiritiladi.
- Texnik ma'lumotlar: Unit tarixi, xizmat jurnallari va spamdan himoya uchun IP manzilning xeshi; IP manzilning o'zi bazamizda saqlanmaydi.
- Qurilma belgisi: brauzeringizda tasodifiy yaratilgan uzun raqam-harf qatori (UUID); u qurilmangiz, IP manzilingiz yoki brauzer xususiyatlaridan hisoblanmaydi. U brauzer xotirasida va
saytkor_devcookie'sida 2 yil saqlanadi, serverga yuboriladi va hisob birinchi marta ochilganda hisobingiz bilan birga saqlanadi. Maqsadi — bir qurilmadan ko'plab hisob ochib, sovg'a Unitlarini suiiste'mol qilishning oldini olish (24 soat ichida bir qurilmadan bir nechta hisob ochilsa, sovg'a Unitlari tekshiruvgacha ushlab turiladi). U reklama uchun yoki boshqa saytlarda kuzatish uchun ishlatilmaydi va hech kimga berilmaydi. Brauzer xotirasi va cookie'ni tozalasangiz, yangi belgi yaratiladi. Taklif havolasi orqali kelgan bo'lsangiz, taklif kodisaytkor_refcookie'sida 30 kun eslab qolinadi. Saytkor'ga birinchi marta qaysi havola orqali kelganingiz (UTM belgilari — masalan, Instagram'dagi e'lon — va oldingi saytning domeni)saytkor_srccookie'sida 30 kun saqlanadi va ro'yxatdan o'tganingizda hisobingizga yoziladi; ro'yxatdan o'tgach so'raladigan «Saytkor haqida qayerdan bildingiz?» javobi (ixtiyoriy) ham shunday saqlanadi. Bular faqat qaysi e'lon va kanal foydali ekanini umumiy statistikada ko'rish uchun ishlatiladi.
2. Ma'lumotlar nima uchun ishlatiladi
- hisobingizga kirish va uni himoya qilish;
- saytingizni yaratish, saqlash va internetga chiqarish;
- saytingizdagi arizalarni sizga yetkazish;
- firibgarlik, spam va qonunga zid saytlarning oldini olish (avtomatik tekshiruv va moderatsiya);
- xizmatga oid xabarlar yuborish: emailni tasdiqlash, parolni tiklash va shunga o'xshash;
- xizmat sifatini oshirish va sizga yordam berish: AI so'rovingizni tushunmagan yoki xato qilgan joylarni topish, AI'ni yaxshilash va kerak bo'lsa sizga «Saytkor jamoasi» nomidan javob yozish yoki Unitni qaytarish.
Ma'lumotlaringiz reklama uchun ishlatilmaydi. Reklama yoki kuzatuv cookie'lari ishlatilmaydi. Platforma brauzeringizda faqat zarur narsalarni saqlaydi: kirish sessiyasi, qulaylik sozlamalari (til, kun/tun rejimi va h.k.), taklif kodi, birinchi tashrif manbasi va yuqoridagi qurilma belgisi.
3. Qayerda saqlanadi
- Supabase — hisoblar va kirish tizimi, sayt fayllari va versiyalari, arizalar (ma'lumotlar bazasi).
- Cloudflare — internetga chiqarilgan saytlar, yuklangan rasm va fayllar, saytlarni tez ochadigan tarmoq. O'z domeningizni ulasangiz, domen nomi ulanish va SSL sertifikat uchun Cloudflare'ga uzatiladi.
Bu xizmatlarning serverlari O'zbekistondan tashqarida joylashgan. Barcha ulanishlar HTTPS orqali shifrlanadi. Ma'lumotlar bazasida har bir foydalanuvchi faqat o'z ma'lumotlarini ko'ra oladi.
4. Xizmat ko'rsatuvchi hamkorlar
Platforma ishlashi uchun ma'lumotlarning bir qismi faqat shu maqsadda quyidagilarga uzatiladi:
- Anthropic (Claude AI) — sayt yaratish va tahrirlashda siz yozgan matn va sayt fayllari; internetga chiqarishdan oldin sayt matni avtomatik tekshiruv uchun.
- Telegram — arizalarni sizga yetkazish uchun (Pro va Business tariflarida — o'z botingiz va Mini App orqali).
- Click — to'lovlarni qabul qilish uchun. Karta ma'lumotlari bizga kelmaydi: ular Click sahifasida kiritiladi; bizga faqat to'lov summasi va holati xabar qilinadi.
- Resend — xizmat emaillarini (tasdiqlash, parol tiklash, tarif eslatmalari) yuborish uchun: bunda email manzilingiz va xat matni uzatiladi.
- Cloudflare Turnstile — kirish va ro'yxatdan o'tishda bot va spamdan himoya tekshiruvi uchun: tekshiruv paytida brauzeringiz ma'lumotlari va IP manzilingiz Cloudflare'ga yuboriladi.
- Google Fonts — shriftlarni yuklash uchun: platforma va saytlar ochilganda brauzeringiz shriftni Google serverlaridan oladi (IP manzilingiz Google'ga ko'rinadi).
- Yandex Maps va OpenStreetMap — xaritalar uchun: saytda xarita bo'lsa, tashrif buyuruvchining brauzeri Yandex xaritasini yuklaydi; muharrirda manzil qidirilganda qidiruv matni va xarita nuqtasi OpenStreetMap'ga yuboriladi.
- Google — Google orqali kirishni tanlasangiz.
- Ovoz bilan yozish (🎤) — muharrir chatida ovoz bilan yozsangiz, nutq matnga aylantirish uchun brauzeringizning o'z xizmatiga (masalan, Google) yuboriladi; Saytkor ovoz yozuvini olmaydi va saqlamaydi.
- GitHub — saytni o'z repongizga yuklashni tanlasangiz.
- Pexels — stock rasm qidirilganda faqat qidiruv so'zlari yuboriladi, shaxsiy ma'lumot yuborilmaydi.
5. Ma'lumotlar kimga berilmaydi
Ma'lumotlaringizni sotmaymiz, ijaraga bermaymiz va reklama kompaniyalariga bermaymiz. Yuqoridagi hamkorlardan boshqa hech kimga uzatilmaydi. Istisno — O'zbekiston Respublikasi qonunchiligida belgilangan hollarda vakolatli davlat organining rasmiy talabi.
6. Xodimlar kirishi
Platforma egasi va vakolatli xodimlar (administrator, moderator) ma'lumotlaringizni faqat yordam ko'rsatish, moderatsiya (qonunga zid saytlarni tekshirish) va xavfsizlik (suiiste'molga qarshi kurash) maqsadlarida ko'rishi mumkin. Parollaringizni va bot tokenlaringizni hech kim ko'ra olmaydi: parol bir tomonlama shifrlangan, bot tokeni shifrlangan holda saqlanadi, admin panelda va jurnallarda ko'rsatilmaydi va faqat xabar yuborish uchun serverning o'zi ishlatadi.
Xizmat sifatini oshirish va yordam berish uchun jamoamiz AI bilan yozishmalaringizni (so'rovlaringiz, AI javoblari, biriktirilgan skrinshotlar) va yuqoridagi hodisalarni ko'rishi mumkin. Buning uchun faqat administratorlarga, ikki bosqichli tasdiq (2FA) bilan ochiladigan himoyalangan bo'lim ishlatiladi; ro'yxatlarda email va telefonlar yashirilgan holda ko'rsatiladi, to'liq ko'rish har safar jurnalga yoziladi. Bu ma'lumotlar hech kimga berilmaydi. O'quvchilar va bolalar haqidagi ma'lumotlar (AI Ustoz) bu bo'limga tushmaydi.
7. Saqlash muddati va o'chirish
- Ma'lumotlar hisobingiz faol bo'lgan davrda saqlanadi (arizalar bundan mustasno — quyida).
- Saytlarga forma orqali yuborilgan arizalar 90 kun saqlanadi, keyin avtomatik o'chiriladi.
- Xizmat sifatini oshirish uchun saqlanadigan AI so'rovlari matnlari va foydalanish hodisalari 90 kun saqlanadi, keyin avtomatik o'chiriladi; faqat umumiy, shaxsga bog'lanmagan statistika (masalan, so'rovlar soni) qoladi. Muharrirdagi o'z chat tarixingiz saytingiz bilan birga saqlanadi.
- Saytni o'zingiz o'chirsangiz (muharrir → Sozlamalar → Saytni o'chirish), uning fayllari, versiyalari, yuklangan rasmlari va arizalari o'chiriladi.
- Hisobingiz va barcha ma'lumotlaringizni o'chirish uchun ro'yxatdan o'tgan emailingizdan support@saytkor.uz manziliga "Ma'lumotlarimni o'chiring" mavzusida xat yozing. So'rovni 30 kun ichida bajaramiz va javob qaytaramiz.
- Biror saytga forma yuborgan bo'lsangiz va ma'lumotingiz o'chirilishini istasangiz, o'sha sayt egasiga yoki bizga yozing.
- Google orqali kirgan bo'lsangiz, Saytkor.uz'ga bergan ruxsatni istalgan vaqtda Google hisobingiz sozlamalarida (myaccount.google.com → Xavfsizlik → Uchinchi tomon ilovalari) bekor qilishingiz mumkin.
8. CRM: o'quvchilar va ota-onalar ma'lumotlari
Pro va Business tariflaridagi «CRM» bo'limi o'quv markazlari uchun: unga lidlar, o'quvchilar, ota-onalar, davomat va to'lovlar ma'lumotlari kiritiladi.
- Operator — sayt egasi. CRM'ga kiritilgan o'quvchilar, ularning ota-onalari, telefonlari, tug'ilgan kunlari, davomati va to'lovlari uchun mas'ul operator — saytingiz egasi (o'quv markazi). Saytkor.uz bu ma'lumotlarni faqat egasi nomidan saqlaydi va qayta ishlaydi; o'z maqsadida ishlatmaydi, sotmaydi va uchinchi shaxslarga bermaydi.
- Voyaga yetmaganlar. O'quvchilar ko'pincha voyaga yetmaganlar. Ularning ma'lumotlarini yig'ish uchun ota-onasi yoki qonuniy vakilining roziligini olish — o'quv markazining (sayt egasining) javobgarligi.
- Kimlar ko'radi. Ma'lumotlarga faqat sayt egasi va u o'zi taklif qilgan xodimlar (menejer, o'qituvchi) kira oladi; o'qituvchi o'quvchining telefoni va to'lovlarini ko'rmaydi. Platforma xodimlari — faqat 6-bandda ko'rsatilgan maqsadlarda.
- Saqlash va o'chirish. CRM ma'lumotlari hisobingiz faol bo'lgan davrda saqlanadi (arizalar uchun 90 kunlik muddat ularga tegishli emas). Sayt egasi har bir yozuvni yoki barcha CRM ma'lumotini «CRM → Sozlamalar» orqali istalgan vaqtda o'chira oladi; sayt o'chirilsa, uning CRM ma'lumoti ham o'chadi.
- Sun'iy intellekt ishlatilmaydi. CRM o'quvchi va ota-ona ma'lumotlarini sun'iy intellektga yubormaydi va Unit sarflamaydi.
- «AI Ustoz» (ixtiyoriy, Pro va Business). Faqat sayt egasi yoqqanda ishlaydi: o'quvchi saytdagi «AI Ustoz» oynasiga yozgan savol javob olish uchun Anthropic (Claude AI) ga yuboriladi. Savol matni saqlanmaydi; jurnalga faqat vaqt, qurilmaning anonim belgisi va sarflangan Unit yoziladi, bir xil savollarga javob keshda saqlanadi. AI Ustoz shaxsiy ma'lumot so'ramaydi va o'quvchilarni uni yozmaslikka chaqiradi; xarajat sayt egasining Unitidan.
9. Yosh cheklovi
Xizmat 16 yoshdan katta foydalanuvchilar uchun mo'ljallangan. 16 yoshga to'lmaganlar ota-onasi yoki qonuniy vakilining roziligi bilan foydalanishi mumkin.
10. O'zgarishlar va aloqa
Siyosat o'zgarsa, shu sahifada yangilangan sanani ko'rsatamiz; muhim o'zgarishlar haqida platformada yoki email orqali xabar beramiz. Savollar bo'yicha: support@saytkor.uz.
Shuningdek qarang: Ommaviy oferta.